‘சொன்னால் நம்ப மாட்டீர்கள், நான் ஒரு முஸ்லிம்!’ – சின்ன அண்ணாமலை

chinna-annamalai1bபம்பாயில் வகுப்புக் கலவரம் நடைபெற்ற சமயம். ஒருநாள் இரவு சினிமா பார்த்துவிட்டு நான் தங்கியிருந்த வீட்டுக்குத் திரும்ப அனேகம் டாக்சிக்காரர்களை கூப்பிட்டேன்.

மாதுங்கா போகவேண்டுமென்றவுடன், ‘அங்கே போக வேண்டுமானால் ரொம்ப நேரமாகும். வழியில் கலகப் பிரதேசம் இருக்கிறது. ‘கர்ஃப்யு’ ஆர்டர் வேற இருக்கிறது. மணியோ ஒன்பது ஆகிவிட்டது. ஆகையால் வர இயலாது. அப்படி வந்தாலும் யார் என்னைத் திருப்பிக் கொண்டுவந்து விடுவார்கள்? துணையில்லாமல் நான் தனியாக எப்படித் திரும்ப முடியும்? என்று ஒவ்வொரு டாக்சி டிரைவரும் சொல்லிவிட்டார்.

நேரமாக ஆக எனக்கோ நெஞ்சு ‘பக்பக்’ என்று அடித்துக்கொண்டது. ‘சரி இன்று தீர்ந்தோம்’ என்று முடிவு செய்து ஞாபகத்திற்கு வந்த சுவாமிகளை எல்லாம் வேண்டிக் கொண்டிருந்தேன்.

அப்பொழுது ஒரு டாக்சி வந்தது. அந்த டிரைவரிடம் போய் அரைகுறை இந்துஸ்தானியில் ,’மாதுங்கா போக வேண்டும்’ என்று சொன்னேன். அவனும் பழைய கதையைத் திருப்பிச் சொன்னான்.

பிறகு நான் அவனிடம் கெஞ்சுதலாக,’நானும் ஒரு இந்து. நீயும் ஒரு இந்து. உதவி செய்ய வேண்டாமா?’ என்றேன்.

உடனே டாக்ஸி டிரைவர், ‘ஆமாம், இந்துவுக்கு உதவி செய்யத்தான் வேண்டும். சரி ஏறு காரில்’ என்று ஏற்றிக்கொண்டு போய் மாதுங்காவில் நான் தங்கியிருந்த வீட்டின் முன் பத்திரமாக இறக்கி விட்டுவிட்டு,

’சாப், நான் இந்துவல்ல, ஒரு முஸ்லிம். உண்மையான முஸ்லிம் யாருக்கும் தீங்கு செய்யக் கூடாதென்பது குரான் வாக்கு’ என்று கூறிவிட்டுக் கம்பீரமாகச் சென்றான்.

நான் கல்லாய் சமைந்து நின்றேன்.

***

சொன்னால் நம்பமாட்டீர்கள், சின்ன அண்ணாமலை அவர்களின் நூலை இலவசமாக இங்கிருந்து டவுன்லோட் செய்யலாம்!

சொன்னால் நம்பமாட்டீர்கள், மேலே பதிவிட்ட பகுதி  ’தேவகோட்டை’ பிளாக்கில் கிடைக்கிறது. ஆனால், – கூகிள் அக்கவுண்ட்டில் லாகின் செய்தாலும்-  ’invited readers only’ என்ற தகவல் வருகிறது. நான் ஒரு முஸ்லிம் என்பதால் போலும். எடு கீபோர்டை..!

சூரிய வணக்கத்தில் சுகி. சிவம்

யாரோ யாரையோ வெட்டிக்கொண்டிருந்தார்கள் – அதிகாலைக் கனவில். இத்தனைக்கும் சுரேஷ் சொன்னாரே என்று Les sentiments பார்த்துச் சிரித்துவிட்டு உறங்கியிருந்தேன். இப்போது உடல் நடுங்க என்ன காரணம்? படித்ததெல்லாம் வந்து தொலைகிறதோ கனவாக? எழுந்து டி.வியைப் போட்டால் (போட்டேன் என்றால் நிஜமாகவே போட்டேன், அப்போதான் அது இயங்கும்) குளோஸ்-அப்பில் வாசித்துக் கொண்டிருந்தார் குன்னக்குடி. குலுங்கக் குலுங்க அவர் முன்னே ஆடிக் கொண்டிருந்த பெண்மணிக்கு குறைந்தது ஐம்பது வயசு இருக்கும். எழுந்து ஓடாமல் பொறுமை காத்து ஏழெட்டு சானல்கள் மாற்றியது நல்லதாகப் போயிற்று. நாலு நல்லவார்த்தை சொன்னார் அடுத்துவந்த சுகி.சிவம் ஐயா  ) அவருடைய மதநல்லிணக்க ‘பேக்கேஜ்’ மனசுக்கு இதமாக இருந்தது. ஆடியோ ரிகார்டிங் செய்ததை அப்படியே பகிர்கிறேன். இதன் வீடியோ லிங்க் கிடைத்தால் தெரியப்படுத்துங்கள், இணைக்கிறேன். நன்றி. – ஆபிதீன்

**

”நான் ஒரு சாமி கும்பிடுறேன் என்பதற்காக மத்தவன் கும்பிடுற சாமியையெல்லாம் கேவலமாப் பேசலாமா? குறைவா பேசலாமா? (இதெல்லாம்) கூச்சமில்லாம நடக்குது இந்த நாட்டில! ஒரு சமய நல்லிணக்க மாநாடுல கலந்துக்குற வாய்ப்பு எனக்கு கிடைச்சது. கவிக்கோ அப்துல்றகுமான் அவர்களும் பேசினாங்க. எனக்கு ரொம்ப மகிழ்ச்சியா இருந்தது. ஒரு கருத்து சொன்னேன். நான் அடிப்படையில ஒரு மதத்தை சார்ந்தவனா இருந்தாலும் மத்த மதங்களோடு என்னை  இணைச்சிக்கிறதுக்கு ஒரு கொக்கி வச்சிருக்கேன். நீங்க ரெயில்வே ஸ்டேஷன்ல பாருங்களேன். ரெயில்பெட்டி இருக்கு, இல்லையா? அதுக்கு முன்பக்கத்து பெட்டியோட மாட்டிக்கிறதுக்கு ஒரு கொக்கி இருக்கும். பின்பக்கத்து பெட்டியோட  மாட்டிக்கிறதுக்கு ஒரு கொக்கி இருக்கும். இந்த கொக்கிகள் மூலமாகத்தான் இணைப்பாங்க, ரெயில் பாட்டுக்கு ஓடிக்கிட்டே இருக்கும். அதுமாதிரி , அடிப்படையிலெ நான் ஒரு மதம் சாரந்தவனா இருந்தாகூட இன்னொரு மதத்தோட என்னை இணைக்கிறதுக்கு ஒரு கொக்கி வச்சிருக்கேன். என்ன கொக்கி? எனக்கும் உங்களுக்கும் எந்த பிரச்சனையும் கிடையாது சார், நீங்க உங்க கடவுள கும்பிடுறீங்க, உங்க கொள்கையை கும்பிடுறீங்க, அது எல்லாமே சிறந்ததுதான், அதை நான் குறை சொல்ல மாட்டேன், உங்களோட வழிபாட்டு முறையை நான் குறை சொல்ல மாட்டேன், அப்படீன்னு… இப்ப அடிப்படையில நான் ஒரு மதம் சாரந்தவனா இருந்தாலும் எனக்குள்ளே இன்னொரு மதங்களுக்கு உரிய அந்த இணைப்பு கொக்கி இருக்கு. அப்படி இருக்கணும். அப்படி இருந்தா பிரச்சனை இல்லை. இது உள்ளவர்கள் , நல்லா யோசிச்சி பாருங்க, எல்லா மதத்தவரோடும் இணங்கிப் போறாங்க. எல்லா மதத்துலேயும் ஞானிங்க இருந்திருக்காங்க, எல்லா மதத்துலேயும் உயர்ந்த சிந்தனை உள்ளங்க இருந்திருக்காங்க, எல்லா மதத்துலேயும் இறையனுபவம் பெற்றவங்க இருந்திருக்காங்க. ஒரு குறிப்பிட்ட மதத்துலதான் இறையனுபவம் உள்ளவங்க பொறப்பாங்க, மத்த மதத்திலே இறையனுபவம் உள்ளவங்க பொறக்க மாட்டாங்கன்னு சொல்ல முடியுமா? குழந்தைத்தனமான பேச்சு! உலகம் முழுக்க எல்லா மதங்களிலும் நல்ல இறையனுபவம் உடைய – noble solesன்னி சொல்றோம் பார்த்தீங்களா, மேன்மைதங்கிய ஆன்மாக்கள் – எல்லா மதத்துலேயும் பிறந்திருக்காங்க. குறிப்பிட்ட மதத்துலேதான் பிறப்பாங்க, குறிப்பிட்ட ஊர்லதான் பிறப்பாங்கன்னு சொல்றதெல்லாம் வளர்ச்சியடையாதவர்கள் பேசுற பேச்சு…

அந்த சமயநல்லிணக்க மாநாட்டுலே கவிக்கோ ரொம்ப அழகா ஒரு கருத்து சொன்னாரு. இந்த பக்குவப்படுத்துவது – அதுதான் சமயம்னு பேரு, சமயம்னா சமைப்பதுன்னுதான் அர்த்தம் – நம்ம குக்கர்லெ என்னா பண்றோம் ஒரு பொருளை வேக வைக்கிறதுக்கு இத்தனை விசில் விடுறதுன்னு ஒரு கணக்கு வச்சிருக்கோம்  (பா.பருப்பு, து.பருப்பு, க.பருப்பு பற்றியெல்லாம் சொல்கிறார்). இப்ப கடினமான மாமிசம் வேகணும்னா ஏழெட்டு விசில் அடிச்சாதான் வேகும். ரொம்ப அழகா கவிக்கோ சொன்னார், ‘இந்த மனுசன் ஒரு மோசமான மாமிசம். இவன வேகவைக்கிறதுக்கு ஏகப்பட்ட விசில் வேண்டியிருக்கு’ன்னார். எல்லா தீர்க்கதரிசிகளும் – பல மதங்கள்லேர்ந்து வர்றாங்க பாருங்க.. இவங்கள்லாம் அத்தனை விசில் மாதிரி. பல லட்சம் விசில் அடிச்சாதான் இந்த மனுசன் வேகுவான். இல்லேண்ணா சுலபத்துலெ வேகமாட்டான். அப்படீன்னாரு.. யோசியுங்க. மனுசனை பக்குவப்படுத்துறது அவ்வளவு கஷ்டமா இருக்கு. இன்னொரு கருத்து ரொம்ப  வேடிக்கையா சொன்னாரு. அழகான உவமை ஒண்ணு சொன்னாரு. கோயில் யானை அறுத்துக்கிட்டு ஓடிப்போச்சு. ஏண்டான்னு கேட்டா ‘அதுக்கு மதம் பிடிச்சிடுச்சி சார்’ங்குறான். அப்துல் றஹ்மான் சார் சொன்னாரு ‘ அதுக்கு மதம் பிடிக்கலைடா, அதனால்தான் அறுத்துக்கிட்டு போச்சு!’ ஒரு கோயிலுக்குள்ளே (மட்டும்) இருக்கவேணாம்னு…பொயடிக்கா கருத்து சொன்னாரு. என்ன குறிப்பு? மதம் பிடிப்பதென்பது நல்லதா? நல்லதல்ல. மதப்பற்று என்பது வேறு. மத உணர்வு என்பது வேறு. மதங்களின் பெயரால் சண்டையிடுவது என்பது வேறுதான். எல்லா மதங்களிலும் தீர்க்கதரிசிகள் தோன்றியிருக்காங்க. ராமாயணத்துல என்ன செய்தி வருதோ அதே மாதிரியான செய்தியை வேற மதங்கள்ல பார்க்க முடியாதா? உதாரணம் சொல்றேன் பாருங்களேன், ராமனுக்கு தேனும் மீனும் கொண்டுவந்தான் குகன் அப்படீன்னு இருக்கு. அவன் மனசு நோகக்கூடாதுன்னு ‘உண்டனம்’ அப்படீன்னு சொன்னாராம். அத சாப்பிட்டேம்பா! தேனும் மீனையும் அருவருப்பா சொல்லலையாம். பரிவினில்… ‘இது எங்களுக்கு ரொம்ப பவித்திரமானதுப்பா’ என்றார். பவித்ரம்னா புண்யமானது, உயர்ந்ததுன்னு அர்த்தம். இதே மாதிரி ஒரு வரலாறு அண்ணல் நபிகள் அவர்களின் வாழ்க்கையில் காட்டட்டுமா? அண்ணல்
நபிகள் உட்கார்ந்திருக்காரு. ஒரு அம்மா கொண்டுவந்து திராட்சைப்பழங்கள் கொடுக்குது. அதை நீங்களே சாப்பிடனும்னு சொல்லுது. நபிகள் நாயகத்திடம் ஒரு நல்ல பழக்கம் என்னான்னா என்ன கொடுத்தாலும் எல்லார்க்கும் கொடுத்துட்டுதான் சாப்பிடுவாரு. அப்பேர்ப்பட்ட பண்பாளர். இந்த அம்மா ஒரு குலை திராட்சைப்பழத்தை கொடுத்து நீங்களே சாப்பிடுங்கன்னு சொல்லுது! ஒரு பழத்தை எடுத்து வாயில போட்டாரு. பேசிக்கிட்டே அவர்பாட்டுக்கு எல்லா
பழத்தையும் பிச்சி தன் வாயிலே போட்டுக்கிட்டாரு. கூட இருந்த நபித்தோழர்கள் எல்லாம் யோசிக்கிறாங்க. என்னடா இது, இப்படி பண்ணமாட்டாரே. அப்படீன்னு. அந்த அம்மா ரொம்ப சந்தோஷத்தோட எந்திரிச்சி போச்சு. அது போனபிறகு எல்லாரும் கேட்டாங்க, பெருமானே நீங்க இப்படி சாப்பிட மாட்டீங்களே, என்ன இப்படி இன்னக்கி’ன்னு. மிஞ்சியிருந்த ஒரு திராட்சையை எடுத்து ஒருத்தர்ட்ட கொடுத்து சாப்பிடுங்கன்னு சொல்றாரு நபிகள். அவர் வாயிலே போட்டு, ’தூ, புளிக்குது’ங்குறாரு. ‘ஆங்…இப்படி நடந்துடக்கூடாதுன்னுதான் எல்லாத்தையும் சாப்பிட்டேன்., நீ இப்படி துப்புனியே, அந்த அம்மா மனசு நொந்துபோகாதா?’ன்னாரு. அப்ப யோசிச்சுப் பாருங்க, பிறர் மனம் நோகக்கூடாதுன்னு ராமர்  நெனைச்சாரு. நபிகளும் நெனைச்சாரு. எங்கேயும் உயர்ந்த பண்புகள் இருக்குங்குற அடையாளம்தானே இது? அப்புறம் என்ன மதங்கள் பெயரால சண்டை?

நம்முடைய முன்னாள் குடியரசுத் தலைவர் டாக்டர் அப்துல்கலாம் ஒரு விழாவுக்குப் போறாரு. குத்துவிளக்கு ஏத்தச் சொல்றாங்க. அதை ஏத்துறதுக்கு அவர் கையில மெழுகுவர்த்தி கொடுத்தாங்க. எவ்வளவு Presence of Mind பாருங்க! ’ஒரு இஸ்லாமியனான நான் கிருஸ்துவமதத்தின் அடையாளமான மெழுகுவர்த்தியைக் கொண்டு ஹிந்துமதத்தின் அடையாளமான ‘குத்துவிளக்கை ஏற்றுகிறேன். இவையெல்லாம் இணைந்தால் ஒளி பிரகாசிக்கும். இந்தியா ஒற்றுமையோடு இருந்தால் ஒளியோடு இருக்கும்’னு ஒரு கருத்து சொல்றாரு. யோசிக்க வேண்டாமா?”

**
நன்றி : சுகி.சிவம் அவர்கள், சன்.டிவி.

Bonus : அமைதி பற்றி சுகி.சிவம் (Youtube)
**

நல்லா யோசிச்சாச்சா? நாகரீகமா அடிச்சுக்குங்க! – ஆபிதீன்

முல்லைப் பெரியாறு Scene

பெரிய காமெடிப் பட்டாளம் நடித்த , சத்யன் அந்திகாட் இயக்கிய ’நரேந்ரன் மகன் ஜெயகாந்தன் வகா’ சினிமாவிலிருந்து ஒரு சீன். முழுப்படமே இணையத்தில் பார்க்கக் கிடைத்தாலும் இந்தப்  பகுதி மட்டும் முழுமையாக , தனியாக இல்லை.   மகா கேவலமாக இப்படி யு-ட்யூபில் கிண்டலடித்திருப்பது இருக்கிறது.  அதையொட்டி குடுமிப்பிடி சண்டை வேறு. கீழே இணைத்திருக்கும் பகுதியிலும் ’ஒற்றுமை’ முழுதாக நிலைநாட்டப்படவில்லையாதலால்,  சில வருடங்களுக்கு முன்பு ’ஆசியாநெட்’-ல் ரிகார்ட் செய்ததை (சம்யுக்தா வர்மாவின் சினிமா என்றால் ’லாஜிம்’ ரிகார்ட் செய்துவிடுவேன்)  3gp கோப்பாக மாற்றி இங்கே இணைக்கிறேன். வீடியோ தரம் சுமார்தான் – என்னைப்போலவே. மன்னிக்கவும்.

Download File (3gp)

***

 

Thanks to  ranjikwt

***

சீரியஸாக ஒரு சுட்டி மட்டும் :

முல்லைப் பெரியாறு அணை: கேரள தமிழக உணர்ச்சி அரசியல் – அ.மார்க்ஸ்

எது ஹதீஸ்? – ’புதிய’ நினைவூட்டல்

நாளை மறுநாள் – அருட்கொடையாளர் வரிசையில் ஒன்பதாவதாக – வானவியலாளரும், கணிதமேதையுமான அல்-பத்தானி பற்றிய பதிவு வரும் , ஹமீதுஜாஃபரின் எழுத்தில், இன்ஷா அல்லாஹ். அதற்கு முன்,  எதைக்கெடுத்தாலும் – மன்னிக்கவும்-  எதற்கெடுத்தாலும் ஹதீஸ் சொல்பவர்களுக்கு இந்தப் பதிவு. 

’ஹதீஸ்கள் வேண்டுமா?’ என்று நிறைய விவாதங்கள் நடக்கின்றன..  ’நபி(ஸல்) அவர்கள் தெளிவாகவே தனது இறுதிப் பேருரையில் குறிப்பிட்டுள்ளார்கள்:: “நான் இரண்டை விட்டுச்செல்கிறேன், அவற்றைப் பற்றிக்கொள்ளும் காலமெல்லாம் நீங்கள் வழிதவறமாட்டீர்கள், ஒன்று இறைமறை குர்ஆன். மற்றது என் வழிமுறை” என்று நினைவுபடுத்துகிறார் சகோதரர் இப்னுஹம்துன். நல்லது, முந்தாநாள் சாப்பிட்ட சாப்பாடே சரியாக நினைவுவராதபோது நபி(ஸல்) அவர்கள் இறந்து 200 வருடங்களுக்குப் பிறகு தொகுக்கப்பட்ட ஹதீஸ்களில் எது சரியானது என்ற குழப்பம் சில பேருக்கும் வரலாம். ‘ஆபிதீன் ஒரு முட்டாள்’ என்ற உண்மையை ஒருவரிடம் சொன்னால் அது அப்படியே மாறிமாறிப் போய் பத்தாவது ஆளிடம் செல்லும்போது ‘ஆபிதீன் ஒரு புத்திசாலி’ என்று பயங்கரமான பொய்யாகப் போகிறது, இல்லையா? இந்தலெட்சணத்தில் , ‘நான் சொல்வதுதான் சரி’ என்று ஒவ்வொருகுழுவும் முரண்டுபிடித்துக்கொண்டு அடித்துக்கொண்டால் எப்படி சரி? சண்டை வேண்டாம் சகோதரர்களே, ஆபிதீன் முட்டாள்தான்! திருப்தியா?

ஆமா…, தனக்கு அருளப்பட்டது மட்டுமே உண்மை என்று நினைத்துக்கொண்டு பிற மதத்தைச் சார்ந்த சகோதரர்களுக்கு புத்தி சொல்லப் புறப்பட்டுவிடுவது நியாயம்தானா? நேற்று ஷார்ஜா வந்து இறங்கிய நண்பன் ஹமீது , திட்டச்சேரி-கொந்தையில் நடந்து தகவலைச் சொன்னான். ’ஆஹா பக்கங்கள்’ நண்பர் காதர் ‘ஏஹே பக்கங்கள்’ என்று ஆரம்பித்து எகிற வேண்டிய செய்தி.  ஐயப்ப பக்தர்களுக்கு ’அட்வைஸ்’ செய்தார்களாம் ’ஜாக்’  சகோதரர்கள் அங்கே. இன்னும் நோட்டீஸ் கிடைக்கவில்லை.  சுட்டி மட்டும் கிடைத்தது.  இதெல்லாம் என்ன மாதிரி மனநிலை? ’நம்பிக்கை வைத்து கல்லையும் பார்த்தால் தெய்வத்தின் காட்சியம்மா ; அதுதான் உள்ளத்தின் காட்சியம்மா ; அதுதான் உண்மைக்கு சாட்சியம்மா’  என்பான் கண்ணதாசன் (கண்ணதாசன் பற்றிய பதிவு அடுத்து வருகிறதாம்!).

இருக்கிற குழுக்கள் போதாதென்று இன்னொரு விசேசமான பிரிவு. இவர்களுக்கு குர்ஆன் மட்டுமே போதும்!

C.S. ரஃபியுத்தீன் ஆசிரியராக இருந்த ’புதிய நினைவூட்டல்’ மாத இதழிலிருந்து (டிசம்பர் 2000) பதிவிடுகிறேன். குர்ஆன் மட்டுமே பின்பற்றவேண்டிய ஒரே ஹதீஸ் என்று சொல்லும் பிரிவைச் சார்ந்தவர் ஆசிரியர் என்று தெரிகிறது. ஒரு பெண்ணின் ஒரு விரல் வெட்டப்பட்டல் 10 ஒட்டகங்கள்; இரு விரல்கள் வெட்டப்பட்டால் 20 ஒட்டகங்கள்; மூன்று விரல்கள் வெட்டப்பட்டால் 30 ஒட்டகங்கள்; ஆனால் நான்கு விரல்கள் வெட்டப்பட்டால் 20 ஒட்டகங்கள் மட்டும் கொடுத்தால் போதும் போன்ற ’கணித அற்புதத்தை’ (இமாம் மாலிக் எழுதிய முஅத்தாவிலும் (43/11) இமாம் அஹ்மத் இப்னு ஹன்பல் எழுதிய முஸ்னதிலும் ( 2/182) இந்த அற்புதம் இருக்கிறதாம்) கிண்டலடிக்கிறார் ஆசிரியர். இப்போது இந்த பத்திரிக்கை வருகிறதா என்று தெரியவில்லை. ஆசிரியர் இருக்கிறாரா என்றும். நினைவூட்டுங்கள்.

**

’நீங்கள் இறையச்சமுடையவர்களா? படியுங்கள்! சிந்தியுங்கள்!’ என்று ஹதீஸ்களின் உண்மை நிலையை விளக்குகிறார் ஆசிரியர். அவர்தான் கட்டுரை எழுதியிருக்க வேண்டும். நபி இறந்த பின் 200 வருடங்கள் கழித்து ஹதீஸ்களின் ஆசிரியரான புகாரியின் வாழ்வில் ஒரு நாளாம்.. ’உங்களுக்கு ஏதேனும் ஹதீஸ்கள் தெரியுமா?’ என்ற (புகாரியின்) கேள்விக்கு ஒருவரிடமிருந்து வந்த ஒப்புயர்வற்ற பதில் இது

’ஆம்! என் தந்தை கூற நான் கேட்டிருக்கிறேன், இறைவன் அவருக்கு அருள் செய்வாராக. அவர் தன்  பெரிய அண்ணனிடம் கேட்டதாகக் கூறினார், இறைவன் அவருக்கு அருள் செய்வாராக. அவர் தன் பாட்டியாருடன் அமர்ந்திருந்தபோது பாட்டியார் கூறினார், இறைவன் அவருக்கு அருள் செய்வாராக. அவர் தன் பெரிய மாமாவுடன் அமர்ந்து உணவருந்திக்கொண்டிருக்கையில் அவர் கூறினார். அவருடைய தாய்வழிப் பாட்டனாருக்கு இமாம் அஹ்மத் பின் முஹம்மத் அல்யமானியைத் தெரியும் என்றும் , இறைவன் அவருக்கு அருள் செய்வாராக,  அவர் தன் மூத்த மாமா , இறைவன் அவருக்கு அருள் செய்வாராக , நபித்தோழர் உமர் இப்னு காலித் அல்யமானியைச் சந்திக்கும்போது , இறைவன் அவருக்கு அருள் செய்யட்டும், அவர் கூறினார். முஹம்மத் நபி மீது சாந்தி நிலவட்டும், என்னிடம் கூறினார்…..’

அவ்வளவுதான் கிண்டல். இதற்கு உத்மான் பின் அலி என்பவரின் கார்ட்டூன் வேறு.

நல்லவேளையாக, ‘ஆனால் அவர்களின் பெரும்பாலோர் யூகங்களேயன்றி பின்பற்றவில்லை. மேலும் யூகங்கள், உண்மைக்கு மாற்றாக இருக்க இயலாது. நிச்சயமாக இறைவன் அவர்கள் செய்பவற்றையெல்லாம் முற்றிலும் அறிந்தவராக இருக்கிறார்’ என்ற குர்ஆன் வசனத்துடன் (10:36) முடித்திருக்கிறார்கள். (அல்லாஹ்) ‘இருக்கிறார்’ என்று சொல்வது ரஷாத் கலீபா வின் குர்-ஆன் மொழிபெயர்ப்பு போலும். (அல்லாஹ்) இருக்கிறான் என்று மரியாதையாக – அளவற்ற பிரியம்தான் காரணம் – சொல்வதே இஸ்லாமியர்களின் இயல்பு. வீட்டில் ஏதேனும் கெடுதல் நிகழ்ந்தால் ‘ஒரு கழிச்சல்ல போற அல்லாஹ்வுக்கு கண் இல்லையா? பாக்க மாட்டேங்குறானே…’ என்று கத்தும் உம்மாக்கள் , ரசூல் ஸல்லல்லாஹூ அலைஹிவஸல்லத்தின் பெயரைக் கேட்டால் அவ்வளவுதான். நெகிழ்ந்து கண்ணீர் விடுவார்கள்.

போதும்.  என் மேல் கோபம் வேண்டாம்.  இதழைக் கொடுத்த ஜபருல்லாநானாதான் ’நினைவூட்டலை’ப் போட்டியுமாங்னி?’ என்று நினைவூட்டினார். நினைவூட்டுகிறேன்; இறைவன் அவருக்கு அருள் செய்வாராக!

« Older entries Newer entries »