இதயத்துல இறை அச்சம் இருந்தா போதும் – விமலாதித்த மாமல்லன்

mamallan3786. நண்பர் விமலாதித்த மாமல்லனின் அற்புதமான ‘உயிர்த்தெழுதல்’ சிறுகதையில் ஒரு முஸ்லிம் பாவா (ஃபக்கீர், துறவி) சொல்வதை நன்றியுடன் பதிவிடுகிறேன். ‘எங்கும் நிறைந்த இறைவன் எந்த உயிருக்கும் எதிரி அல்ல. எல்லோருக்கும் நண்பன். அடுத்தவனைக் கெடுக்க நினைக்காதவரை அடுத்தவன் வயிற்றில் அடிக்க நினைக்காதவரை அவனது அருள் அனைவருக்கும் கட்டாயம் உண்டு’ என்று சொல்லும் பாவா அவர்.

முன்னெச்சரிக்கையாக  சிறுகதையின் PDFஐ இந்தப் பக்கத்தில் இணைக்கவில்லை. ஆனால் முழுசாக  நீங்கள்  இங்கே பார்த்து தரவிறக்கம் செய்யலாம் , இறையச்சத்தோடு. யார் கையையும் உடைக்காமல் வாசியுங்கள். – ஆபிதீன்.

**

‘எப்பிடிக் கூப்ட்டா இன்னா. கொறல் கூப்புட்றவன் காதுல வுழணும். அதான் முக்கியம். அதனால்தான் அல்லாஹ்ன்னு சொல்லுனு யாரையும் கட்டாயப் படுத்தறதில்லே. ஆண்டவனேன்னு சொல்லு. படைச்சவனேன்னு சொல்லு. படியளக்குறவனேன்னு சொல்லு. இறைவா, கடவுளே எல்லாத்துக்கும் மீறின ஒரு சக்தியேன்னு, எப்பிடி வேண்ணாக் கூப்புடு. எந்தப் பேராலக் கூப்ட்டாலும் அண்டசராசங்கள் அனைத்திற்கும் ஒன்றேயான அவனைப் போயி அது அடைஞ்சிடும். அப்பர் பர்த்துல ரிசர்வ் பண்ணி இருந்தாலும் ஏஸி கோச்சுல ஏறி இருந்தாலும் ஆர்டினரி அன்ரிஸர்வ்டு கம்பார்ட்மெண்டுல அடிச்சி புடிச்சி மொடங்கிக்கினுக் கெடந்தாலும் அஜ்மீர் போற ட்ரெயினு அல்லாரையும் அஜ்மீருக்குத்தானேக் கூட்டிக்கினுப் போவுது. நாலாற் ரூவா டிக்கெட் வாங்கினவனுக்கும் நாப்பது ரூவா குடுத்து பிளாக்குல பால்கனி டிக்கெட் வாங்கினவனுக்கும் வேற வேற படமாக் காட்றாங்க சினிமாக் கொட்டாயில, அது மாதிரிதான். அவனவன் வசதிக்கு ஏத்தா மாதிரி, வழக்கத்துக்கு ஏத்தா மாதிரி எப்படி வேண்ணாக் கூப்புட்லாம். கும்புட்லாம். இதயத்துல இறை அச்சம் இருந்தா போதும்.’

**

30 பி,டி.எஃப் தந்த விமலாதித்த மாமல்லனுக்கு முத்தங்கள்.

« Older entries