மாமனிதர் கக்கன்

செம்பியன் வளவனின் ஃபேஸ்புக்கிலிருந்து, நன்றியுடன்.. (ஷேர் செய்த நண்பர் மஜீத், ’படிச்சு உச்சுக்கொட்ட மட்டுமே நம்மளால இப்ப முடியும்’ என்று சொல்லியிருந்தார்..)

***

kakkan-chembian

உலக வரலாற்றிலேயே உயர்திரு கக்கன் போன்ற நேர்மை நாணயத்திற்க்கு உதாரணமான அமைச்சரை பார்ப்பது கடினம். தமிழக வரலாற்றில் உயர் திரு கக்கன் அவர்கள் ஒரு வைரக்கல்.

உயர் திரு .கக்கன் போன்ற நாணயமான அரசியல்வாதி இந்திய அரசியல் கட்சிகள் எதிலும் கிடையாது .

மதுரை மேலூர் வட்டத்தில் தும்பைப்பட்டி என்ற சிற்றூரில் பூசாரி கக்கன் என்ற தோட்டிக்கு மகனாகப் பிறந்து, வறுமையில் உழன்று, பெரும்பாடுகளுக்கிடையே பள்ளி இறுதிவகுப்பு வரை படித்து முடித்துப் பொதுவாழ்வில் ஈடுபட்ட மாமனிதர் அவர்.

மதுரை வைத்தியநாத ஐயர் கக்கனை வளர்ப்பு மகனாக அரவணைத்துக் கொண்டார்.

மாசுமருவற்ற தோழர் ஜீவாவின் தலைமையில் தான் கக்கனின் திருமணம் நடந்தது.

இரவு நேர பள்ளிகளுக்குச் சென்று சேவை செய்துள்ளார். பள்ளிக்குழந்தைகளுக்கு உணவளிக்க தனது மனைவியின் தாலியை அடகு வைத்து பணம் தந்து உதவி உள்ளார்.

சுதந்திர போராட்டம்

காந்தி 1934-ல் மதுரை வந்தபோது அவருக்குத் தொண்டாற்றும் வாய்ப்பு கக்கனுக்கு வந்து சேர்ந்தது. காங்கிரஸ் நடத்திய போராட்டங்களில் தீவிரமாகப் பங்கேற்ற கக்கன் 1942 ஆகஸ்ட் புரட்சியின் போது மேலூர் காவல் நிலையத்தில் சிறை வைக்கப்பட்டார். அவர் மனைவி முன்னிலையில் 5 நாட்கள் கசையடி கொடுத்து சக தோழர்களை காட்டிக் கொடுக்கச் சொன்னபோது கடைசி வரை அடி வாங்கினாரே தவிர, காட்டிக் கொடுக்கவில்லை. சுயநினைவு இழந்தவரை குதிரை வண்டியில் பாதம் வைக்கும் இடத்தில் கிடத்தி, தலையும் கால்களும் தொங்கிய நிலையில் இழுத்துச் சென்றனர்.

தமிழக அரசியல்

இந்திய சுதந்திரத்திற்க்கு பின் தமிழ்நாடு கங்கிரஸின் தலைவராகப் பணியாற்றிய தாழ்த்தப்பட்ட இனம் என்று அதிகார வர்க்கத்தால் பிரிக்கபட்ட மனித இனத்தின் முதல் மனிதர் கக்கன். அந்த புனிதர் வகித்த பதவியை தான் இன்று பல பணம் திண்ணும் பிணங்கள் வகிக்கிறது.

தமிழகத்தில் 10 ஆண்டுகள் தொடர்ந்து அமைச்சராக இருந்த கக்கன் பொதுப்பணி, உள்துறை, விவசாயம், உணவு, மதுவிலக்கு, அரசின நலம், அறநிலையத்துறை போன்ற பல்வேறு இலாக்காக்களை நிர்வாகித்தார்.

கக்கன் அமைச்சராகப் பொறுப்பிலிருந்த காலகட்டத்தில் மேட்டூர், வைகை அணைகள் கட்டப்பட்டன. மதுரை வேளாண்மைக் கல்லூரியைக் கொண்டு வந்தார்.

விவசாயிகளுக்குத் தேவைக்கேற்ப உரம் கிடைக்க வழிவகை செய்தது, கூட்டுறவு விற்பனைக் கூடங்களைத் தொடங்கி வைத்தது, தாழ்த்தப் பட்டோர் நலத்துறையின் கீழ் ஆயிரக்கணக்கான பள்ளிகளைத் திறந்தது, தாழ்த்தப் பட்டோருக்கென வீட்டு வசதி வாரியம் அமைத்துச் செயல்படுத்தியது, காவல்துறையில் காவலர்கள் எண்ணிக்கையை அதிகப் படுத்தியது, லஞ்ச ஒழிப்புத் துறையைத் தொடங்கியது என ஏராளமான அரசு பணிகள் உயர் திரு கக்கன் அவர்கள் ஆரம்பிக்கபட்டது.

அவர் அமைச்சர் பொறுப்பிலிருந்த போதும் அவரது துணைவியார் ஆசிரியைப் பணி செய்தே குடும்பத்தைக் கவனித்தார். அவர் நாடாளுமன்ற உறுப்பினராக இருந்த காலத்திலும் அவரது தந்தையார், தான் செய்து வந்த வருவாய்த்துறை ஊர்ப்புற உதவியாளர் பணியைச் செய்தே வாழ்க்கை நடத்தினார்.

அமைச்சராக இருந்த போது மதுரை வந்த போது அரசு விடுதியில் வேறு நபர் இரவில் தங்கி இருக்கிறார். அவரை வெளியேற்றலாமா? என்கிறார்கள். வேண்டாம் எனத் தடுத்து விடுகிறார். தனியார் விடுதியில் அறை எடுக்கலாமா? என்கிறார்கள். வேண்டாம் என்று சொல்லி விட்டு, ரயில்வே காலனியில் தனது உறவினரின் சிறிய வீட்டில் போய் தங்குகிறார்.

பத்தாண்டுகள் மிக முக்கியத் துறைகளின் அமைச்சராக இருந்த கக்கன் 1967 – தேர்தலில் தோற்ற பின்பு சொந்தக் கூரை கூட இல்லாத பரம ஏழையாகப் பேருந்தில் நின்றபடி பயணித்தார்.

கக்கன் நாடாளுமன்ற உறுப்பினாராக இருந்த போதும், தன் மனைவி சொர்ணம் தொடக்கப்பள்ளி ஆசிரியையாகத் தொடர்ந்து பணியாற்றுவதையே விரும்பினார். வலிமை மிக்க, அமைச்சராக அவர் வலம் வந்தபோது தன் மகள் கஸ்தூரிபாயை மாநகராட்சிப் பள்ளியில் தான் படிக்கச் செய்தார். தன் தம்பி விஸ்வநாதனுக்கு தாழ்த்தப்பட்டோர் நலத்துறை இயக்குநர் லயோலா கல்லூரிக்கு அருகில் ஒரு கிரவுண்ட் மனையை ஒதுக்கீடு செய்து அரசாணையை அளித்த செய்தியறிந்த கக்கன், அந்த ஆணையை வாங்கிக் கிழித்தெறிந்தார்.

விடுதலைப் போராட்டத் தியாகத்துக்காக அவருக்குத் தனியாமங்கலம் என்ற கிராமத்தில் தரப்பட்ட நிலத்தை, வினோபாவின் நிலக்கொடை இயக்கத்தில் ஒப்படைத்தார். முடக்கு நோயால் பாதிக்கப்பட்டவர் கோட்டக்கல் சித்த மருத்துவமனையில் சேர்க்கப்பட்டார். மருத்துவமனையில் பணம் செலுத்த முடியாத நிலையில் நோய் தீராமலே அங்கிருந்து விடை பெற்றார்.

மதுரை அரசு மருத்துவமனையில் சேர்க்கப்பட்டு சாதாரண வகுப்பில் அவர் சிகிச்சை பெற்றபோது, மதுரை முத்துவை நலம் விசாரிக்க வந்த முதல்வர் எம்.ஜி.ஆர்., காளிமுத்துவின் மூலம் செய்தியறிந்து கக்கனைபோய்ப் பார்த்தவர் அதிர்ந்து போனார். உடம்பில் ஒரு துண்டு மட்டும் போர்த்திக் கொண்டு, முக்கால் நிர்வாண நிலையில் இருந்த கக்கனைக் கண்டு கலங்கி நின்ற எம்.ஜி.ஆர்., சிறப்பு வார்டுக்கு மாற்ற உத்தரவிட்டபோது, ‘ வேண்டாம் என்று மறுத்து விட்டார். ‘உங்களுக்கு நான் என்ன உதவி செய்ய வேண்டும் என்று கேட்ட எம்.ஜி.ஆரிடம், ‘நீங்கள் பார்க்க வந்ததே மகிழ்ச்சி என்று கைகூப்பினார் கக்கன்.

கடைசிக் காலத்தில், வறுமையில் வாடியது கண்டு, திரு.பழ நெடுமாறன், மதுரையில் நிதி திரட்டி வந்த நிதியை நிலையான வைப்புத் தொகையில் போட்டு வட்டியில் வாழ்க்கை நடத்துங்கள் என்று யோசனை சொல்கிறார்கள். மறுத்து விட்டு முன்பு தேர்தலின் போது நாவினிப்பட்டி மைனர் தந்த பணம் 11000 திருப்பித் கொடுக்கிறார். அவர் நான் கேட்கவில்லை, கடனாக தரவில்லை என மறுத்து போதும் அந்த பணத்தை திருப்பித் தந்து விடுகிறார்.

டிவிஎஸ் நிறுவனத்தில் தங்கியதற்காக ரூ.1,800 கட்டுகிறார். அவர்கள் கேட்கவில்லையே ஏன் ? செலுத்த வேண்டும் என்கின்றனர். நான் என்றாவது திருப்பித் தருவேன் என்ற நம்பிக்கையில் தான் அவர்கள் கேட்கவில்லை என கூறி பணத்தை திருப்பி கொடுத்தார் . இப்படிப்பட்ட ஒரு அமைச்சரை உலகின் எந்த நாட்டிலும் பார்க்க முடியாது.

இறுதிவரை ஏழ்மையிலேயே வாடிய கக்கன் நோய்வாய்ப்பட்ட போது, உயர் ரக சிகிச்சைகள் எடுத்துக்கொள்ள வசதியின்றி சென்னை அரசு மருத்துவமனையில் சேர்க்கப் பட்டார். நினைவிழந்த நிலையில் இரு மாதங்கள் இருந்த அவர், 1981 டிசம்பர் 23-ஆம் நாள் உலக வாழ்வை நீத்தார். எளிமையின் வடிவமாக நேர்மையின் விளக்கமாக நம்மிடையே வாழ்ந்து மறைந்த கக்கன் உடல் கண்ணம்மாபேட்டையில் டிசம்பர் 24, 1981 அன்று எரியூட்டப்பட்டது.

நன்றி :
http://www.thangampalani.com/
http://rssairam.blogspot.in/

***

நன்றி : செம்பியன் வளவன்

Advertisements

3 பின்னூட்டங்கள்

  1. 18/12/2012 இல் 14:05

    முஹம்மது நபியின் ஏழ்மையான வாழ்வை அவர் ‘தேர்தெடுத்துக் கொண்ட ஏழ்மை’ என்பார்கள். அதையே எளிமையாக இப்படி நாகூர் ஹனீபா பாடுவார்,

    “எண்ணற்ற வசதிகள் இருந்தும் வாழ்க்கையில் யாரசூலுல்லாஹ்!

    நீங்கள் ஏழையாகவே இருந்ததும் ஏனோ யாரஸூலுல்லாஹ்!

    நபி வழியில் நம் வாழ்க்கை என சின்ன சின்ன, வசதியான விசயங்களை மட்டும் கெட்டியாக பிடித்து கொண்டு தலை கீழாக குதிக்கும் நமக்கு பாடமாக கற்பிக்க பட வேண்டியது திரு கக்கன் ஐயா அவர்களின் வாழ்க்கை!..

  2. 18/12/2012 இல் 19:40

    கக்கன் மட்டுமல்ல அந்த காலத்து அமைச்சர்கள் பெரும்பாலோர் அப்படித்தான் இருந்தார்கள். காரணம் அனைவருமே சுந்தந்திரப் போராட்டக்காரர்கள். அவர்களுக்கு சுதந்திரன் வலி தெரியும். நாட்டின் மீது பாசம் இருந்தது. தான் அடிமையாக இருந்தாலும் பரவாயில்லை மக்கள் மகான்களாக வாழவேண்டும் என்று நினைத்தனர். ஆனால் இன்று தலைகீழ் நிலமை. என்ன செய்வது? விதியை நினைத்து வேதனைப் படுவதைத் தவிர வேறு வழி இல்லை.

  3. தாஜ் said,

    18/12/2012 இல் 21:48

    அன்றைய காலக்கட்டத்தில்
    மதுரை மீனாட்சி அம்மன் கோவிலில்
    புரோகிதர்களால்
    தீண்டாமை அதிகமாகப் பாராட்டப்பட்டது என்றும்,
    கக்கன் மந்திரி ஆகாத தருவாயில்
    அவர் தாழ்த்தப்பட்ட இனம் என்பதற்காக
    கோவிலின் உள்ளே விட
    அந்த புரோகிதர்கள் அனுமதிக்கவில்லையாம்!
    அதனை அறிய வந்த காமராஜ்
    மிகவும் மனம் வருந்தினாராம்.

    பின்நாளில் கக்கன்ஜீயை
    மேற்கண்ட சம்பவத்தின் பொருட்டு
    ‘அறநிலைத் துறை’ மந்திரியாக்கி
    மதுரை மீனாட்சி அம்மன் கோவிலுக்கு
    பணி நிமிர்த்தமாக
    காமராஜ் அனுப்பி வைக்க…
    பரிவட்ட மரியாதைகளோடு
    கக்கன் அங்கே அப்படி வரவேற்கப்பட்டிருக்கிறார்!
    அந்நிகழ்ச்சியை அறியவந்தப் பிறகே
    காமராஜ் மனம் சாந்தி கொண்டதாக சொல்வார்கள்.
    உண்மையும் அதுதான்.

    கக்கன்ஜீயின்
    நேர்மையையும்/ உண்மையையும்
    முன்வைத்து
    இங்கே நாம் வியக்கிறோம்.

    கக்கன் ஜீ
    தனது, நேர்மைக்கும்/ உண்மைக்கும்
    காமராஜையே அடையாளம் காட்டி நின்றவர்!
    இதனையொட்டி
    காமராஜின் உயர்வை
    நாம் எளிதில் உணர்ந்து அறிய முடியும்!

    இப்படியான
    காமராஜையும்/ கக்கன் ஜீ யையும்
    நான்,
    என் அரசியல் தலைவர்களாக
    இயர்கையாகவே பெற்றிருந்தேன்
    என்பதினை
    இங்கே நினைவு கூறுகிற போது
    மெனி சிலிர்த்தடங்குகிறது.
    -தாஜ்


மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out / மாற்று )

Twitter picture

You are commenting using your Twitter account. Log Out / மாற்று )

Facebook photo

You are commenting using your Facebook account. Log Out / மாற்று )

Google+ photo

You are commenting using your Google+ account. Log Out / மாற்று )

Connecting to %s